الحلقة الرابعة: قادش

"رأى فرعون مصر في ابنة الملك الحيثي أنها جميلة كانها الهة، ولقد وقع جمالها في قلب جلالته وأحبها أكثر من أي شيء آخر، ومنحها الإسم المصري مانفرو رع، وبهذا أصبح الملكان قلبا واحدا كأخوين وعاشت الدولتان في سلام"

نص تسجيلي على جدران معبدي الكرنك وأبوسمبل

الحلقة الرابعة

قادش

المشهد الأول

1285 ق.م

وادي نهر العاصي

"الأمير "خع ام واس" ابن الملك "رمسيس الثاني" يؤدي صلاته على ضفة النهر ويراقبه أخاه الأمير "مرنبتاح

هرماً يا برنس -

مرحب تاح، ايه أخبار الجيش يا عم؟ -

زي اللوتس، العيال النعرونا "طلبة الحربية" قلبهم أجمد من البازلت، تقدر تقول ان اقتراح ضمهم للجيش* كان -فكرة جامدة

بس مانتش شايف ان حرمانهم من الحريم في المدرسة وبعدين هنا هيأثر عليهم -

هيأثر!؟ هو لسه هيأثر، من يومين واحد من القواد لقاهم بيتسحبوا واحد ورا التاني على خيمة في آخر المعسكر، قام -دخل وراهم لقاهم مقضيينها عربدة وجايبين واحدة شقرا وقال ايه بتغني لهم "بد – دي – دوب"، بس ايه، حاجة كده تضاريسها عالية

عيب يا راجل دي قلة أدب، وعملت فيهم ايه؟ -

ماقلتش للملك طبعا، هو في ايه وللا ايه، وبعدين ده كان حطهم على المسلات -

مين ده؟ ابوك؟ ده انت قلبك أبيض من الكتان، ده قليل ان ما كان هايصادر البت -

على رأيك، انت شفت بيتكلم ازاي على الحريم بتوع المنطقة دي، مش قادر ينساهم من أيام حملة جدك سيتي الأول، -آمون يبشبش التابوت اللي تحت راسه

معركة قادش

المشهد الثاني

الأميران نفسيهما في موكب الجيش رجوعا إلى مصر

مش معقول يا خع، ايه يا جدع ولا كلمة من ساعة ما المعركة خلصت وحققنا النصر -

عايزني أقول ايه يعني، ومين قال لك ان فيه نصر اتحقق؟ -

طبعا انتصرنا وأعلنا بعده وقف إطلاق المنجنانيق -

وليه نعلنه، إحنا كنا خلاص مسكناهم من رقبتهم لحد ما هربوا جوه القلعة، تقدر تقول لي ليه بطلنا ورجعنا؟ احنا مش -*كنا جايين عشان نحتل قادش؟ ايه اللي رجعنا من غير ما ننفذ اللي عايزينه؟

بس ماتقدرش تنكر ان الخطة اللي حققنا بيها الإختراق كانت عبقرية، دي أكيد هاتتدرس بعد كده لحد آلاف السنين -*في المدارس العسكرية

ماهو ده اللي مخوفني، بعد كده ممكن تكون دي عادة الجيوش المصرية، الهزايم بتبقى على ودنه وتحقيق الإنتصارات -للشهرة بس

بس برضه ماتنساش اننا من موقع القوة ده نقدر نفرض السلم عليهم ونحقق السلام -

هاهاها، سلّم لي على سلمك سلام -

رمسيس الثاني

المشهد الثالث

غرفة النوم الرئيسية بالقصر الملكي بمدينة "بر رعمسسو"

الملك رمسيس الثاني وزوجته جميلة الجميلات نفرتاري

باقول لك ايه يا نفرتاري -

ايوه، خير -

ايه رأيك اننا نحاول نعمق جذور العلاقات الدبلوماسية بيننا وبين الحيثيين -

باقلق منك يا ميسو لما بتتكلم كلام تخين، باقول لك ايه، هات م آخر البردية -

قصدي يعني لو ناسبنا خاتوسيلي الثالث هايبقى النسب ده حاجة كويسة -

تقصد اننا ناخد واحدة من بناته لحد من الولاد؟ -

آه آه طبعا، أمال ايه يعني، إوعي تكوني دماغك راحت لحاجة تانية، عايزك بقى تعملي اتصالاتك الجميلة مع بوتوخيبا مراة خاتوسيلي -وتمهدي لي...، قصدي وتمهدي لنا للموضوع

يا خوفي من ألاعيبك، أنا عارفة، انت هاتفرسني وتموتني ناقصة عمر -

*ماتقوليش كده، ندرن عليا لو متي ناقصة عمر لأعمل لك مقبرة يغير منها الآلهه -

ــــــــــــــــــــــــــــــــــــــــــــ

* حقائق تاريخية

الحلقة الثانية: يا فراعنة يا رجالة!!!!!؟

من قديم الزمان

وفي روما وفي اليونان

ستات ومتستتة

في معابد متثبتة

تلاقيها واخدة مكان

تماثيلها محفوظة

وبيعبدوها كمان

نرجع على مصرنا

نتكلم عن إيزيس

معبودة وأم حوريس

وليه مفيش عندنا

غيرها يا عم عويس؟؟؟

الحلقة الثانية: يا فراعنة يا رجالة!!!!!؟

المشهد الأول

2320 قبل الميلاد

معبد فرعوني بمنف

الكاهنين نيانخم وخم حتب

نيانخم- أنا خلاص اتخنقت...من ساعة ما اتعينّا في المعبد ده وكل ما حد يخش يقدم قرابين لإيزيس بابقى عايز أخنقه

خم حتب- على رأيك أنا مش عارف ايه ده

!...نفسي أعرف هما كان عاجبهم فيها إيه عشان يعملوها إلهه-

أصلا موضوع إلهه ده مش نازل لي من زور-

قصدك إيه؟-

قصدي يعني إن الستات مش كفاية التقطيع اللي كانوا بيقطعوه علينا في كل بارتي بنروحه لأ ونعبدهم كمان-

- آه فكرتني كله كوم ورادوبيس دي لوحدها كوم تاني, دي كل ما أشقط زبون على الشط تيجي المركبة بتاعتها معدية يقوم الواد رامي نفسه في النيل عشان بس يلمس السفينة

تشقط إيه؟؟؟-

قصدي يعني كنت, هو أنا أقدر ألعب بديلي من وراك يا راجل-

بس ماتقولش راجل-

آه لا مؤاخذة, بس انت ايه رأيك في حوار إيزيس ده؟-

أنا باقول كفاية آلهة ستات على كده, وزي ما انت شايف إحنا وظيفتنا يالنسبة لسننا دلوقتي بتأهلنا إننا نبقى كبار الكهنة *بعدعشرين سنة كده-

آآآآآآآآآآآه فهمتك يا لئيم, قصدك ننقي الكهنة اللي هايمسكوا بعدنا زي حالاتنا كده عشان يفضلوا على نفس المنهج -واللي بعدهم واللي بعدهم والعملية تمشي كده

تمااااااااام, بس العملية دي مش مضمونة وده اللي مخوفني, أصل ممكن الكهنة اللي هاييجوا بعد كده يقلوا بينا -ويطلعوا رجاله

المهم إننا نعمل اللي علينا -

صورة من مقبرة الكاهنين نيانخم وخم حتب بسقارة

االمشهد الثاني

زوج من الأصدقاء يجلس على قهوة "سما-سم" في أحد ضواحي منف

وله, إنت مش ملاحظ حاجة بقى لها كام شهر في المعبد -

لأ مش واخد بالي -

"تصدق إن أكتر صلاة بتاخد وقت هيا بتاعة الإله "مينو -

آه صح فكرتني,الصراحة ده مش منظر إله, طب يستر عورته الأول وبعدين ييجيلنا نعبده -

مش دي المشكلة انت عايز إله الخصوبة يبقى عامل إزاي يعني, بس المشكلة إنه واخد حقه بزيادة اليومين دول -

إشمعنى يعني عشان النيل فيضانه زايد السنادي -

فيضان مين ياعم, مش محتاجة تفسير دي, مش نيانخم وخم حتب اللي ماسكين المعبد اليومين دول -

قصدك يعني إنهم ناويين يتجوزوا فبيصلوا كتير لإله الخصوبة -

لأ ده انت حمار بقى, يابني دول مالهومش في الجواز أساسا -

استنى استنى, أنا سمعت الحوار ده قبل كده بس ماصدقتوش -

لأ صدق, حتى الموضوع ده وصل للكهنة -

يخرب بيوتهم, أتاريييييهم كل صلاة بيقولوا الستات يرجعوا مع اجوازهم ورا هما والبنات والشباب يطلعوا قدام -

آه ويقول لك عشان الشباب مايتشغلوش عن الصلاة بالبصبصة -

يتشغلوا بحاجة تانية أحسن -

هاهاهاهاهاهاها --

جدارية للإله مين

ــــــــــــــــــــــــــــــــــــــ

* حقيقة تاريخية

الحلقة الثالثة: ملكة من عامة الشــ... الشعب

الحلقة الثالثة

ملكة من عامة الشــ... الشعب

المشهد الأول1417 ق.م

قاعة العرش، الملك تحتمس الرابع وولي العهد امنحتب "الثالث فيما بعد"

ما هو انت يا مجنون يا اما عايز تجرسّني يا اما ضارب كلّة، قول تاني اللي انت قلته يا روح أمك -

عايز أتجوز واحدة من الشعب المصري -

يعني اللي سمعته ده أتقال بجد وكنت فاكر نفسي اصنجيت -

ايه المشكلة جلالتك، ما امي نفسها مش من الشعب المصري أصلا -

- أمك يا روح أمك كانت بنت ملك الميتانيين*، يعني بنت ملوك برضه، لكن اللي هاتجيبهالنا دي مش عارفين بنت أنهي تور في المملكة

ماتخافش يا بابا، ده أبوها حتى كاهن مرة واحدة -

زغردي ياللي مانتيش غرمانة، يعني من بتوع معاهم معاهم عليهم عليهم، وأنهي واحد فيهم بسلامته؟ -

*يويا بتاع أخميم -

*بتقول ايه يابن الهابلة "يخلع صندله وينهال به على رأسه"، مش ده بتاع معبد الإله مين -

بالراحة بس يا بابا وانا أفهمك -

تفهمني إيه، ده دي لوحدها مصيبة، وللا المصيبة التانية، انت عارف مراته تويا اللي تبقى أم المحروسة لقبها ايه؟ - طب لو راجل قوله

*"يجري مبتعدا" كبيرة حريم آمون -

اسم آمون حارسااااك، طب ولما هي كبيرة حريم آمون عايز تتجوز بنتها ليه؟ عشان يبقى زيتنا في آلهتنا -

اسمعني بس جلالتك، انت لو شفتها هاتعذرني -

لو شفتها هاموتك انت وهي وهادفنكم من غير مصطبة ولا حتى حصيرة، ياللا غور من وش أمي الساعة دي -

المشهد الثاني

مكتب "بيت – خب - را" الهندسي للإستشارات الفرعونية، بعد10 سنين تقريبا

A2 مهندس خالع راسه متأملا في بردية مقاس

يدخل زميل له غاضبا

آمون يخرب بيت الكفرة، الجدع ده هايجنن ميتين أبويا -

فيه ايه بس بالراحة -

بالراحة ايه، طب عاوز يحفر للست بحيرة تتفسح فيها وقلنا ماشي، قال عايز مساحتها 3700 * 700 دراع -مصري "52 سم" وقلنا برضه ماشي، لكن يديني مهلة اسبوعين بس* ده كلام مجانين

وطي صوتك يا باشمهندس بس، الحيطان ليها ودان -

ماحدش ليه عندي حاجة، واذا كان امنحتب حابو بقى مدير فمش هايعمل مدير عليا، هو نسي بتاع بنها ان أصله -*كاتب في الجيش

يا جدع اهدى "يقوم ويقفل الباب" الموضوع سهل، أطلب عمّال زيادة والموضوع يتحل -

حاضر، لما نشوف آخرتها، لكن لو ماجاوبوش طلبي أنا هاقدم استقالتي وأروح استلم العقد بتاع فينيقيا، دول -هايبوسوا ايديا عشان أروح لهم

ومين سمعك، أنا راخر طلعان عين أبويا في التماثيل الجديدة المطلوبة -

فيه ايه تاني -

الملكة تي بسلامتها بتتشرط من ساعة ما جابت اسم آمون حارسه امتحتب الرابع "اخناتون فيما بعد" وقال -*ايه: عاوزه تمثالها جنب الملك يبقى بنفس الحجم

ايه! دي اتجننت باين، أمال لو كانت حلوة كانت عملت ايه؟ -

ولما سألتها الملك عارف كده قالت لي: انت مالك الأمر انت واخده مني أنا -

يا نهار منيل -

لأ وايه كمان عايزاني أنقش اسمها على الجعارين التذكارية بتاعة جواز الملك من بنت ملك الميتانيين -

*أيوه أيوه، مش دي اللي جايبة معاها 317 وصيفة -

آآآآآآآآآآآه شفتهم يا بني وطلعوا ايه، مرمغة -

خلاص، عاش، أنا هاروح أعس كده وأشوف الليله دي ايه، يلعن أبو الشغل لابو البحيرة، سلام -

المشهد الثالث

قاعة العرش

الملك والملكة مع رسول ملك بابل ، يقرأ الملك رسالة ملك بابل، ثم يطويها

يعني الملك بتاعكم عايز يناسبنا -

ويكون له عظيم الشرف بزواجه من بنت جلالتكم يا مولاي -

طب قول له....."تقاطعه الملكة هامسة في أذنه" قول له... قول له...."لم يسبق من قديم الأزل أن أعطيت أميرة -مصرية إلى أي انسان"*

ـــــــــــــــــــــــــــــــــــــــــــــــــــــــــ

* حقائق تاريخية

الملكة تي

الحلقة الأولى: الهرم

تحقق أن صدر الأرض مصر.....ونهداها من الهرمين شاهد

فواعجبا فكم أفنت قرون...........عليها وذاك الثدي ناهد

الحلقة الأولى

الهرم

المشهد الأول

عام 2591 قبل الميلاد

القصر الفرعوني

الملك خنم خواف وي "خوفو" مع زوجته

ايه بتبص لي كده ليه أول مرة تشوفني؟ -

لأ بس بافكر في حاجة كده -

ايه بتفكر في ايه -

تفتكري شكل الهرم المدرج ده طبيعي؟ -

انت جاي تفتكر دلوقتي بعد ما اتعمل بخمسة وتسعين سنة؟ -

bionic أصل الواد المهندس الجديد لعب في دماغي بطريقة جديدة إسمها -

دي bionic ايه -

يعني biology technique قصده يقول -

أتارييييك عمال تبحلق لي من الصبح وانا فهمتك غلط وكنت هاقوم اتكحل -

يا شيخة إحنا في ايه وللا في ايه -

المشهد الثاني

في خيمة بجانب موقع البناءعام 2571 قبل الميلاد

المهندس حم ايون ومساعده

أنا هاتجنن الراجل ده هايوديني المورستان -

اهدا شوية يا فندم فيه ايه وبعدين لسه مافيش مورستان اتعمل -

ماهي حاجة تجن, الأول نقّى الموقع المنيل بنيلة ده وخلانا نشتغل فيه قال عشان لازم يحطه هنا قبل ما الدراعات - بتاعة النيل تتفرع وبعدين خلاني أعمل كل جهة في الهرم بتشيرلجهة من الجهات الأربعة عشان يبقى متسنتر, وبعدين طلع لنا بحكاية الكسوة بتاعة الحجر الجيري عشان سطح الهرم يبقى ناعم*, وكل ما آجي أتكلم يقول لي البيونك البيونك, ماكانتش كلمة قلتها له في ساعة فضفضة, بس اللي هايجنني حكاية التلبيسة اللي عايز يحطها فوق الهرم دي بعد ما قربنا نخلص

الا صح يا فندم ايه حكاية التلبيسة دي؟ -

أبدا يا سيدي عايز يعمل قال تشكيل صغير فوق الهرم من الجرانيت يادوب قد خمس الهرم كده ويبقى بارز فوق الهرم -

وده ليه يا فندم -

عشان البيونك يا سيدي برضه -

الله يخرب بيت البيونك, على فكرة يا فندم العمال فيهم ناس هرشت وبقى شكلنا وحش قوي -

ولسه لما نبتدي نعمل التلبيسة الجرانيت, اوزوريس يستر علينا -

هرم خوفو

ـــــــــــــــــــــــــــــــــــــــــ

حقائق تاريخية